ЁВОН. Имрӯзҳо дар саросари ҷумҳурӣ, аз он ҷумла дар ноҳияи Ёвон баҳри баррасӣ ва амалисозии моҳияти Паёми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷамъомаду мулоқотҳо баргузор гардида истодаанд, ки ҳадаф аз онҳо саҳм гузоштан дар пешрафту тараққиёти мамлакат мебошад.
Дирӯз чунин вохӯрӣ дар Коллеҷи тиббии ноҳия бо иштироки кормандони масъули Кумитаи иҷроияи ҲХДТ дар ноҳия ва вакили Маҷлиси намояндагони Маҷлиси Олии Ҷумҳурии Тоҷикистон Азимзода Толибхон Ситамурод бо устодон ва донишҷӯёни ин боргоҳи маърифат вохӯрии судманд доир карда шуд.
Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми имсолаи хеш ба Маҷлиси Олии кишвар самтҳои тараққиёти мамлакатро вобаста ба вазъи ҷаҳони муосир ва бо дарназардошти пешомадҳои сиёсию иқтисодӣ ва иҷтимоию фарҳангӣ муайян ва мушаххас намуданд.
Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҳуҷҷати муҳимест, ки омӯзиш ва дар амал татбиқ намудани он кафолати амнияти кишвар ва рушди бонизоми иқтисодиву иҷтимоии мамлакатро дар бар мегирад. Амалисозии ин ҳуҷҷати аҳамияти стратегидошта аз ҳар фарди ватандӯст, дар навбати аввал аз хизматчиёни давлатӣ ва фаъолони ҷомеа ҳисси баланди масъулиятшиносӣ ва ватандӯстиро тақозо менамояд.
Пешрафту тараққии ояндаи соҳаҳои иқтисодиву иҷтимоии ҷумҳурӣ ва боз ҳам боло рафтани сатҳи зиндагии мардуми кишварамон, пеш аз ҳама, ба амалӣ гардидани нуктаву хулосаҳои Паёми Роҳбари давлат робитаи мустақим дорад.
Амалисозии нуктаву хулосаҳои Паёми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарзи шаҳрвандӣ ва ватандории ҳар як сокини мамлакат аст ва моро водор менамояд, ки баҳри анҷом додани корҳои бунёдкориву созандагӣ ва расидан ба асолати миллӣ беш аз пеш масъулиятшинос бошем, изҳор доштанд дар вохӯрӣ масъулин.
