14 август пас аз анҷоми Маҷлиси Кумитаи иҷроияи ҲХДТ дар вилояти Хатлон Каримзода Мирзоқосим, муовини Раиси Ҳизби Халқии Демократии Тоҷикистон, Саидзода Ҷамшед Ҳамро, раиси Кумитаи иҷроияи Ҳизби Халқии Демократии Тоҷикистон дар вилояти Хатлон, Муминзод Абдулмаҷид Мубин, раиси шаҳри Бохтар ва Ташрифзода Амиралӣ, раиси Кумитаи иҷроияи ҲХДТ дар шаҳри Бохтар, бо мақсади шиносоӣ аз ҷараёни корҳои омодагӣ ба соли нави таҳсил аз Муассисаи таҳсилоти миёнаи умумии №11-и шаҳри Бохтар дидан намуданд.
Дар ҷараёни боздид ҳайати меҳмонон аз синфхонаҳо, утоқҳои фаннӣ, китобхона ва толори варзишии муассиса дидан намуда, бо масъулин ва омӯзгорон суҳбат оростанд. Зимни суҳбат таъкид гардид, ки таълиму тарбия на танҳо дар сатҳи баланди фаннӣ, балки бо руҳияи ватандӯстӣ ва арзишҳои миллӣ роҳандозӣ гардад.
Сарвари муассисаи таълимӣ иттилоъ дод, ки дар остонаи соли нави хониши 2025-2026 корҳои зиёди таъмирӣ ва ободонӣ амалӣ карда шудаанд. Аз ҷумла, деворҳои дохили мактаб рангубор, мизу курсӣ ва таҷҳизоти дарсӣ навсозӣ, саҳни муассиса тоза ва зебо гардонида шудааст. Ҳамчунин, барои баланд бардоштани сатҳи саводнокии хонандагон гӯшаҳои фаҳмондадиҳӣ оид ба фанҳои дақиқ таъсис ёфтаанд.
Каримзода Мирзоқосим зимни суҳбат бо омӯзгорон зикр намуд, ки мактаб на танҳо ҷойи омӯзиши донишҳои илмӣ, балки маркази ташаккули ҷаҳонбинии ҷавонон аст. Ӯ аз масъулин даъват ба амал овард, ки дар ҳамкорӣ бо волидон ва ҷомеа ҷиҳати баланд бардоштани масъулияти хонандагон кор баранд.
Дар анҷоми боздид изҳори боварӣ карда шуд, ки омӯзгорон ва хонандагони Муассисаи таҳсилоти миёнаи умумии №11 бо дастовардҳои арзанда ба соли нави таҳсил қадам мегузоранд ва дар оянда комёбиҳои бештар ба даст хоҳанд овард.
Аҳлиддини Муборакшоҳ,
“Ҳамрози халқ”
