КУШОНИЁН. Бо мақсади фаҳмонидани муҳтавои Паёми Президенти Ҷумҳурии Тоҷикистон муҳатарм Эмомалӣ Раҳмон ба Маҷлиси Олии кишвар дар муассисаи таҳсилоти миёнаи умумии рақами 16- и Ҷамоати деҳоти Навбаҳор бо сокинони деҳаи Истиқлоли ҷамоати мазкур вохӯрӣ доир карда шуд.
Дар чорабинии мақсаднок тарғиботчиёни назди Кумитаи иҷроияи ҲХДТ дар ноҳияи Кӯшониён зимни суханронӣ оид ба муҳтавои Паёми Пешвои миллат суханронӣ намуда, таъкиди Роҳбари давлатро ёдовар шуданд ва зикр карданд, ки “Ҷавонони мо давомдиҳандагони кору фаъолияти насли калонсол, неруи тавоно ва иқтидори воқеии пешрафти ҷомеа, хулоса, ояндаи давлат буда, фароҳам овардани шароити мусоид барои фаъолияти онҳо минбаъд низ ҳамчун яке аз масъалаҳои муҳимтарини сиёсати ҳукумат боқӣ мемонад”.
Вобаста ба ин лозим аст, ки дар рушди инфрасохтори варзишӣ мусоидат намуда, ҷавононро ба варзиш ва дигар корҳои солимгардонӣ ҷалб созем, аз неруи созандаи ҷавонон дар татбиқи қонунҳои миллӣ, пойдориву устувории фарҳанги милливу забони давлатӣ ва пешгирӣ аз пайдоиши терроризму экстремизм васеъ истифода барем.
